By pigfong & darkside想去好耐o既北海道雪祭之旅, 今年冬天終於都如願以償了~今次旅行其實已經籌備o左一年…因為機票是用Asia Miles換的, 所以一年前已經要打去換飛, 奈何咁早都係換唔到直航飛, 只可以o係東京轉機…由於換飛前只係搵過o下d雪祭日期, 冇詳細搵有咩地方好玩, 所以就諗住跟返上次夏天北海道之旅咁, 札幌入, 函館出, 再落東京玩幾日先返香港。 換完飛, 直至出發前數月先開始plan行程, 直至當時先發現原來想去o既地方都集中在道央同道東的, 落函館似乎唔係咁順路…不過冇計啦, 機票已經冇得改, 有得再食函館朝市同小丑漢堡包都唔錯丫!今次行程由6/2開始, 首先於北海道地區逗留8天, 所到之處包括札幌, 小樽, 旭川, 層雲峽, 阿寒湖, 釧路和函館, 接著13/6便會落東京, 再走一趟河口湖, 16/2才回港, 頭尾總共11天~~~6/2, plan o左咁耐, 終於都出發喇! 今日6am起身, 6:30am出門口, 等到7am至有機場巴士…7:45am去到機場check-in, 先前講過, 我地原本係要先去東京成田機場<0925/1425>, 再等4個幾鐘至轉機去札幌<1840/2020>, 點知check-in時地勤話我地班機好full, 問我地想唔想轉去做直航, 9:40am起飛, 3:20pm到札幌, 無啦啦可以轉直航, 仲早咁多去到札幌喎, 當然係諗都唔駛諗就答應啦!!! 就係咁我地去程o既航班由原本:06 FEB 2010CX548 HONG KONG, T1 0925TOKYO NRT, T2 1425JL3047 TOKYO NRT 1840SAPPORO CHITOSE 2025
更改為:06 FEB 2010CX580 HONG KONG, T1 0940SAPPORO CHITOSE 1510
而另外2程航班則如下:13 FEB 2010JL1168 HAKODATE 1500TOKYO HANEDA 1625
16 FEB 2010CX521 TOKYO NRT, T2 1620HONG KONG, T1 2035check-in完就同上次去宿霧一樣去lounge食免費早餐了, 原本想去上次睇落幾正但係冇去到o個間的, 點知執左!! 咁唯有又去返上次果間啦, 今次比上次多好多人呀, 食物方面都係差唔多, 最正都係有汽水, 樽裝水任攞呢。食完早餐就行返去22號閘口等上機<原來無人駕駛列車係冇得搭返轉頭先…-_->, 班機係大機, 有2層, 上層應該係頭等…頭先地勤話原本班機好full, 點知o黎班都好full, 好多旅行團, 雪祭加新年真係唔講得笑…我地原本full到冇得一齊坐, 只可以坐前後窗口位, 點知出門遇好人, 原來我地2行隔離4個係一家人來的, 佢地主動同我地調位呢, 真係人間有情呀!原定9:40am起飛, 最後遲o左半小時, 10:10am至起飛, 大機果然係唔同d, 有好多戲同電視節目任睇, 係可以隨時play/pause o個種, 我地分別睇o左美食風球同大犯罪家, 美食風球比想像中好睇喎, 但大犯罪家就真係悶到呢…..睇到中途就食飛機餐lu, 派到我地o既時候淨返日式魚飯咋, 味道ok啦<見IMG_2858>, 食完繼續睇戲…經過4個幾鐘之後, 3:10pm終於都到達札幌o既新千歲機場喇, 臨降落o既時間見出面周圍都係得d光禿禿o既樹同雪, 好似黑白片咁<見IMG_0380 & IMG_0385>, 同埋似乎好凍law…落機後轉個彎就到個好細o既入境area, 不過地方好細, 全機幾百人打晒蛇餅咁, 又熱, 等左大半個鐘至過到關呢! 4pm零終於都攪掂晒拎埋行李, 跟手就即刻去去JR info. counter換JR Pass同劃位, 同以前一樣, JR pass都係o係香港買定, 去到換取真正o既JR pass, 再順手book晒之後幾日o既長途車, 包括札幌至旭川, ＳＬ冬之濕原號<ＳＬ冬の湿原号>, 釧路至札幌同埋札幌至函館。 今次我地買o既係4-day flexible pass, 即係第一日用pass開始計, 10日內任揀4日用。o係JR counter等左好一陣子, 姐姐仔又出錯飛, 攪o左差唔多半個鐘至攪掂, 期間見佢地有個識講廣東話o既職員呢, 似乎真係好多香港人去玩。由於訂飛攪o左好耐, 已經miss左班車, 於是去車站隔離間手信舖睇下, 順便買o左個吉列豬扒三文治上車食, 架車原本4:34pm開, 但竟然遲到呢, 真係少見, 上車時又俾d國語人打尖, 攪到無得坐, 真係慘呀! 上車後就好狼狽咁食個吉列豬扒三文治喇, 可能因為唔熱o既關係, 味道麻麻地咋。由新千歳空港去札幌大約要40分鐘, 由落機到上車o既時候都仲未感覺到出面有幾凍, 不過已經見到列車車箱外全部都係積雪, 當架車駛出露天地方就開始驚喇, 周圍都係白矇矇咁, 仲落緊雪添, 會唔會凍死嫁…..企左約40分鐘終於都到札幌站喇, 由於我地住o既酒店o係狸小路, 所以去到札幌要再轉南北線搭1個站於大通站下車, 出閘後沿地下街5分鐘唔駛就到去到酒店-Richmond Hotel, 由於地下街太多出口了, 都搵o左好一陣子先搵到。 Richmond Hotel響札幌有2間, 一間近札幌站, 而我地就揀o左狸小路4丁目o黎間, 原因係無論去雪祭o既薄野會場or大通會場都好近, 2邊都係行2-3個街口就到, 再者酒店一落去就係狸小路, 實在方便得很!到達酒店o既時候已經差唔多6:00pm了, 快快check-in完就上房放低行李, 房間感覺比toyoko inn為大, 而且好新淨, 房內又有len線免費上網, 個人認為唔錯<見IMG_2866 ~ IMG_2875>。好喇, 放低行李, 做足防寒措施之後就出發lu, 一出酒店就已經見到周圍都係積雪了, 第一次見到落雪o既我心情異常興奮呢, 不過行多無耐就開始覺得好凍了…根據飛機上的廣播, 今日氣溫只有-9度, 已經算幾凍架喇。轉o左直航機實在太好了, 早o左幾小時去到札幌, 足以令打後o既行程有所更改~~今年札幌雪祭於5/2至11/2舉行, 一共有3個會場, 分別係大通公園會場, 薄野會場以及Tsudome會場, 由於Tsudome會場比較遠, 所以我地只會去薄野同大通會場, 當中以大通公園會場最大規模, 因此我地第一站就去大通公園會場…由酒店行過去只係~5mins, 去到已經見到好多人好熱鬧了, 我地首先由3丁目開始, 向電視塔<1丁目>方向行, 沿途有d冰雕, 紀念品店等等, 仲有人表演花式snowboard<見IMG_2876 ~ IMG_2928>, 去到電視塔就調頭了, 直至去到4丁目, 終於都見到大大個雪雕喇, 係動物園主題, 好大個好靚, 最衰d大雪雕前面都會有舞台俾人表演, 唔可以近距離接觸啦<見IMG_2932 ~ IMG_2940>, 我地邊行邊影相, 之後又有幾個大雪雕, 仲有好多小形雪雕仔, 好似係d市民/學校/團體整嫁, 麻麻地啦, 有d都幾靚o既, 不過好多都已經有少少溶/走樣了<見IMG_2945 ~ IMG_2979>。 一邊行慢慢就感覺到越來越凍了, d腳趾冰o左, 好似唔係自己o既咁, 不過好彩沿路有d info counter, 手信舖 or 吸煙房等等, 可以耐唔時入去解凍過”暖”河, 叫做頂得住啦…行行下又開始落雪了, 仲越落越大添呀, 我地堅持到小丸子大雪雕<10丁目, 見IMG_2981 ~ IMG_2996>, 之後已經8點幾了, 跟住就走人諗住去狸小路喇, 原本以為好近添, 點知好似越行越唔對路, 周圍好靜, 又落大雪, 差d就迷路…好彩最後都安全到達…行o左陣狸小路, 其實d舖頭已經收得七七八八了, 買左少少手信, 跟住就去七福神商店食飯喇, 七福神位於5丁目, 係食炭燒海鮮的。 我地叫左小狸盛, 睇落都幾豐富丫, 有2隻扇貝, 2隻蝦, 2隻蟹腳, 1隻魷魚, 薯仔同粟米<見IMG_0441 ~ IMG_3017>, 全部o野都係自己放上爐燒燒o下咁, 隻扇貝好大隻好好味, 其他野就一般啦, 同埋有全隻魷魚,…太多了…埋單2147yen, 2個人有海鮮食, 算好平架喇, 不過就唔多夠飽law。食完飯之後再繼續行狸小路, 仲有夾o下公仔咁啦, 玩左800yen, 得好少收穫…跟住再去酒店附近o既企鵝店<激安之殿堂>買左個杯麵諗住拎返酒店做宵夜啦, 點知買完至發現原來附近有Lotteria喎!! 自從上次去完九州之後就非常懷念佢o既蝦堡了, 所以一見到佢就忍唔住買個蝦堡返房食, 真係好好味呢<見IMG_3032>~~食完宵夜沖完涼, 用netbook上o左陣網, 咁就已經12點幾了, 要快快休息喇~~
